Ortopediyanın uğur salnaməsini yazan cərrah- Dr. Boris Poberaj – Dünya idmançılarının etibar etdiyi peşəkar həkim

Müasir tibb elmi daim inkişaf edir, yeni texnologiyalar və müalicə üsulları insanların sağlamlığına xidmət edir. Bu inkişafın önündə isə öz peşəsini sevən, biliyini daim artıran və minlərlə insana sağlam həyat bəxş edən həkimlər dayanırlar. Belə nüfuzlu mütəxəssislərdən biri də ortopedik cərrah Dr. Boris Poberajdır.

Dünyanın müxtəlif ölkələrində fəaliyyət göstərən, idman təbabəti və ortopedik cərrahiyyə sahəsində qazandığı uğurlarla tanınan Dr. Boris Poberaj uzun illərdir ki, xəstələrinin sağlamlığı naminə yorulmadan çalışır. Onun peşəkar fəaliyyəti yalnız uğurlu əməliyyatlarla deyil, həm də ortopediya sahəsində yeni yanaşmaların tətbiqi və tibbi yeniliklərin inkişafına verdiyi töhfələrlə seçilir.

Dr. Boris Poberaj tibb təhsilini Sloveniyanın nüfuzlu ali təhsil müəssisələrindən olan Ljubljana Universitetində almışdır. 1993-cü ildə tibb üzrə ali təhsilini başa vurduqdan sonra ortopediya sahəsini seçərək bu istiqamətdə ixtisaslaşmış, 1999-cu ildə ortopediya üzrə mütəxəssis adını qazanmışdır. Həmin dövrdən etibarən o, həyatını insanların hərəkət azadlığının bərpasına və ağrısız həyata qovuşmasına həsr etmişdir.

Peşəkar fəaliyyətinin ilk illərindən etibarən Dr. Poberaj idman travmaları və oynaq xəstəliklərinin müalicəsinə xüsusi maraq göstərmişdir. O, uzun müddət Sloveniyanın məşhur Valdoltra Ortopediya Xəstəxanasında artroskopiya və idman zədələri şöbəsində çalışaraq böyük təcrübə toplamışdır. Burada əldə etdiyi bilik və təcrübə onun gələcək uğurlarının əsasını təşkil etmişdir.

Dr. Boris Poberajın beynəlxalq karyerasında xüsusi yer tutan mərhələlərdən biri Qətərdə yerləşən və dünyanın ən nüfuzlu idman tibb mərkəzlərindən hesab olunan Aspetar xəstəxanasında fəaliyyəti olmuşdur. O, 2015–2020-ci illərdə burada konsultant ortopedik cərrah kimi çalışaraq dünyanın müxtəlif ölkələrindən gələn peşəkar idmançıların müalicəsində iştirak etmişdir. Aspetar eyni zamanda FIFA tərəfindən tanınan beynəlxalq idman tibb mərkəzi kimi tanınır və burada fəaliyyət göstərmək yalnız yüksək səviyyəli mütəxəssislərə həvalə olunur.

Məhz bu dövrdə Dr. Poberaj dünya səviyyəli futbolçuların, voleybolçuların, basketbolçuların və digər peşəkar idmançıların müalicəsində iştirak etmiş, onların yenidən yarış meydanlarına qayıtmasına yardım göstərmişdir. İdmançılar üçün zədə yalnız fiziki problem deyil, həm də karyera təhlükəsi deməkdir. Buna görə də belə xəstələrin müalicəsində dəqiqlik, təcrübə və peşəkarlıq həlledici rol oynayır. Dr. Poberaj bu etimadı doğrultmağı bacaran mütəxəssislərdəndir.

Onun əsas fəaliyyət istiqamətlərinə çiyin, diz və dirsək oynaqlarının xəstəliklərinin və travmalarının müalicəsi daxildir. Xüsusilə çiyin cərrahiyyəsi sahəsində qazandığı uğurlar beynəlxalq ortopediya ictimaiyyətində yüksək qiymətləndirilir. O, artroskopik əməliyyatların tətbiqi ilə xəstələrin daha qısa müddətdə sağalmasına və normal həyata qayıtmasına nail olur. Müasir minimal invaziv cərrahiyyə üsullarından istifadə etməsi onun fəaliyyətinin mühüm üstünlüklərindən biridir.

Dr. Boris Poberaj yalnız klinik fəaliyyətlə kifayətlənməyib. O, ortopediya sahəsində yeni cərrahi metodların hazırlanması və tibbi alətlərin təkmilləşdirilməsi istiqamətində də mühüm işlər görmüşdür. Mütəxəssis uzunbaş biseps vətərinin fiksasiyası üçün yeni üsul hazırlamış, həmçinin çiyin oynağının stabilləşdirilməsi məqsədilə innovativ tibbi alətlərin yaradılmasında iştirak etmişdir. Bu yeniliklər onun adını beynəlxalq elmi mühitdə tanıtmağa imkan vermişdir.

Elmi və ictimai fəaliyyət sahəsində də Dr. Poberajın xidmətləri xüsusi qeyd edilməlidir. O, Avropa Çiyin Assosiasiyasının (ESA) həmtəsisçilərindən biri olmuş və bir müddət bu nüfuzlu təşkilata rəhbərlik etmişdir. Eyni zamanda ESSKA, EFORT, AANA və digər beynəlxalq peşəkar birliklərin fəal üzvüdür. Bu təşkilatlar ortopediya və idman təbabəti sahəsində elmi yeniliklərin yayılması və mütəxəssislərin inkişafında mühüm rol oynayır.

Dr. Boris Poberaj müxtəlif Avropa ölkələrində keçirilən beynəlxalq konqres və simpoziumlarda məruzəçi kimi çıxış etmiş, öz təcrübəsini gənc həkimlərlə bölüşmüşdür. O, yalnız uğurlu cərrah deyil, həm də təcrübəsini gələcək nəsillərə ötürən pedaqoq və alimdir.

Onun peşəkar fəaliyyətinin əsas prinsipi xəstəyə fərdi yanaşmadır. Hər bir insanın sağlamlıq vəziyyəti fərqli olduğu üçün müalicə üsulları da fərdi şəkildə seçilməlidir. Dr. Poberaj məhz bu prinsipə əsaslanaraq hər bir xəstəni diqqətlə müayinə edir, optimal müalicə planı hazırlayır və reabilitasiya prosesini yaxından izləyir. Bu yanaşma minlərlə insanın ona güvənməsinə səbəb olmuşdur.

Müalicə etdiyi tanınmış idmançıların və xəstələrin fikirləri də onun peşəkarlığının göstəricisidir. Müxtəlif sahələrdən olan insanlar uğurlu əməliyyatlar və reabilitasiya nəticəsində yenidən aktiv həyata qayıtdıqlarını bildirirlər. Bu isə hər bir həkim üçün ən böyük mükafat hesab olunur.

Bu gün Dr. Boris Poberaj ortopedik cərrahiyyə və idman təbabəti sahəsində beynəlxalq nüfuza malik mütəxəssislərdən biri hesab olunur. Otuz ildən artıq peşəkar fəaliyyəti ərzində qazandığı uğurlar onun adını dünyanın müxtəlif ölkələrində tanıtmışdır. Təcrübəsi, elmi yeniliklərə açıq olması, xəstələrə göstərdiyi diqqət və yüksək peşəkarlığı onu müasir ortopediyanın seçilən simalarından birinə çevirmişdir.

Həkimlik yalnız peşə deyil, insan həyatına xidmət missiyasıdır. Dr. Boris Poberaj bu missiyanı şərəflə daşıyan, minlərlə insana sağlamlıq və ümid bəxş edən, ortopediya elminin inkişafına töhfə verən nümunəvi tibb xadimlərindən biridir. Onun fəaliyyəti göstərir ki, yüksək peşəkarlıq, zəhmət və insanlara sevgi bir araya gəldikdə böyük uğurlar əldə etmək mümkündür.

Hörmətli Dr. Boris Poberaj, 17 İyun – Tibb İşçilərinin Peşə Bayramı Günü münasibətilə Sizi səmimi qəlbdən təbrik edirik. Peşənizə göstərdiyiniz yüksək məsuliyyət, humanizm və peşəkarlıq fəaliyyətinizə dəyər qatır. Sizə möhkəm cansağlığı, uzun ömür, elmi və praktik fəaliyyətinizdə davamlı uğurlar və yeni nailiyyətlər arzulayırıq. Hörmətlə, dərin ehtiramla təbrik edirik.

İlhamə Məhərrəmova

Baş redaktor

AJB-nin üzvü