“Tovuz döyüşləri hərb tariximizin ən şanlı səhifələrindən biridir”
Tamam Cəfərova: "Bu döyüşlər ordumuzun qüdrətini, xalqımızın birliyini bir daha nümayiş etdirdi”
"Tovuz döyüşləri hərb tariximizin ən şanlı səhifələrindən biridir və əsrlər sonra da qürur hissi ilə xatırlanacaq”.
Bunu açıqlaamsında millət vəkili Tamam Cəfərova bildirib. Millət vəkili qeyd edib ki, Tovuz döyüşləri ordumuzun və xalqımızın ən mühüm keyfiyyətlərini üzə çıxartmaqla yanaşı, böyük zəfərə gedən yolda da mühüm mərhələ oldu:
"2020-ci ilin Tovuz döyüşlərini xarakterizə edən bir sıra mühüm məqamlar var ki, bunlardan biri Azərbaycan ordusunun cəsarət və qətiyyəti, onun öz torpağı, ərazi bütövlüyü uğrunda sona qədər mübarizə aparmaq əzmi ilə bağlıdır. Məlum olduğu kimi, ötən ilin 12-16 iyul döyüşlərində Azərbaycan ordusunun generalı Polad Həşimov başda olmaqla, daha 11 hərbçimiz düşmənlə mübarizədə qəhrəmancasına şəhid oldu, bununla da sadəcə işğalçı Ermənistana deyil, bütün dünyaya Azərbaycan insanının öz vətəni uğrunda canından keçməyə hazır olmasının mesajını verdi.
Tovuz döyüşləri Azərbaycan xalqını hərəkətə gətirdi, cəmiyyətin bütün təbəqələrini bir amal uğrunda birləşdirdi. Şəhdilərini böyük coşğu və ehtiramla qarşılayan Azərbaycan xalqının minlərlə qəhrəman övladı düşmənlə döyüşmək üçün Səfərbərlik və Hərbi Xidmətə Çağırış üzrə Dövlət Xidmətinin yerli idarə, şöbə və bölmələrinə müraciət edərək könüllü şəkildə cəbhəyə getmək arzularını ifadə etdilər.
Torpaqlarımızı işğal altında saxlayan düşmənin azğınlığı dövlətimizin səbr kasasını daşıran son damlalardan biri oldu. Nəticədə, 2020-ci ilin 27 sentyabr tarixində düşmənin ordumuza qarşı törətdiyi təxribat cəhdlərini uğurlu əks-hücum əməliyyatına çevirən Azərbaycan Silahlı Qüvvələri, cəmi 44 gün içində düşməni darmadağın edərək dövlətimizin ərazi bütövlüyünü təmin etdi. Ermənistan rüsvayçı şəkildə məğlub oldu, onun hərbi potensialının 80%-i məhv edildi. Azərbaycan ordusu bütün şəhidlərimizin qisasını açıq hərb meydanında alaraq düşmənə tarixi dərs verdi.
Bu baxımdan, Tovuz döyüşlərinin mili hərb tariximizdə əlahiddə rola malik olduğu birmənalıdır və bu döyüşlərin hər bir iştirakçısı əsrlər sonra da xalqımız tərəfindən dərin minnətdarlıq və rəğbət hissi ilə yad ediləcək”.
