“Bərdə terrorundan reportaj yayımlayan fransız jurnalisti işdən çıxardılar, amma...”

"Bu gün erməniləri müxdafiə edənlər utanmalıdır. Düzdür, onlarda utanan üz yoxdur və Azərbaycan əleyhinə uydurduqları müxtəlif böhtanlarla düşmənin müharibə dövründə mülki əhaliyə qarşı törətdiyi cinayətləri ört-basdır etməyə çalışırlar. İndi Azərbaycan bu məsələlərin hamısını toplayıb beynəlxalq məhkəməyə göndərib”

 

Bunu Moderator.az-a açıqlamasında politoloq Qabil Hüseynli Bərdə terroru haqda danışarkən deyib. Q.Hüseynli ermənilərin bu yalanını ört-basdır edən havadarlarına da səslənib:

 

"Müharibə gedəndə Avropanın ən inkişaf etmiş xalqlarından olan Fransa və onun səfeh prezidenti Makron Azərbaycana qarşı böhtan ataraq deyirdi ki, guya Azərbaycan Ordusu müharibəni qaydalara uyğun aparmır, həm erməni ordusuna qarşı döyüşlərdə, həm də mülki əhaliyə qarşı genosid həyata keçirir. "Deyir ki, adımı qoyum sənə, səni də qoyum yana-yana”. Amma Azərbaycan Ordusu Beynəlxalq Cenevrə konvensiyasının şərtlərinə uyğun olaraq müharibə aparırdı. Birbaşa düşmənlə üzbəüz vuruşurdu.  

 

Ermənilər Bərdəyə də "Smerç” raketlərindən atəş açırdılar. Gündüz, əhalinin öz işiylə məşğul olduğu vaxt ermənilər bir ay ərzində üç dəfə Bərdəyə raket atdılar. Sonuncu raket daha dağıdıcı oldu. Bu raket Bərdə bazarının yaxınlığına düşmüşdü. Ermənilər müharibə meydanlarından qaçdıqdan sonra bizim əhalini panikaya salmağa, onlarda qorxu hissi yaratmaq üçün mülki əhalinin yaşadığı bölgələri raket atəşinə tuturdular. Həmin raket atəşlərinin dəhşətli nəticələri həm Bərdədə, həm də Gəncədə əyani sürətdə özünü göstərdi. Bir ona şükür edirəm ki, raketlər Bərdəyə düşərkən Tərtərdən Bərdəyə gələn fransız jurnalistlər raketin səsini eşidib hadisə yerinə gəliblər və görüblər ki, Bərdədə hansı mənzərə yaranıb. Yanğın, od tutub alışan maşınlar, yerlə-yeksan edilmiş kiçik ticarət obyektləri və qan içində çabalayan yaralanmış insanlar. Bu erməni vandalizminin, barbarlığının əyani ifadəsi idi. Bunun qədər dəhşətli hadisə eyni zamanda, Gəncədə də baş verdi. Tərtəri çoxları Azərbaycanın Stalinqradı adlandırır və bunu da nahaq yerə demirlər. Tərtər isə artilleriyadan, raketlərdən demək olar ki, hər gün atəşə tutulurdu. Tərtərin zərər görməyən kəndi yoxdur. Üstündən keçən bir il ərazidə bu hadisədə şəhid olanlarımıza Allahdan rəhmət, qazilərimizə isə şəfa diləyirəm. 

 

Ermənilərin Mingəçevir Su anbarını partlatmaq üçün atdıqları "İsgəndər-M” raketləri İsraildən aldığımız "Günbəz" tipli hava hücumundan müdafiə sistemləri ilə ən azı iki dəfə zərərsizləşdirilib. Eyni raketlərlə Bakının dənizdəki neft buruqlarına atəş açmışdılar və onları da havada zərərsizləşdirdilər. İndi Ermənistanın təəssübünü çəkən istər Rusiya, Amerika və istərsə də əvvəllər özünü Avropanın mədəni xalqı adlandıran abırsız fransızlar susmalıdırlar. Azərbaycan bu hadisələrin hamısını beynəlxalq məhkəmələrə çıxarır və orda onlara hüquqi qiymət verilməsini tələb edir. 

 

Fransadan olan jurnalist Bərdədəki hadisəylə bağlı 45 dəqiqəlik reportaj hazırlayıb və televiziyada da yayımlayıb. Amma həmin hadisədən sonra onu televiziyadan kənarlaşdırıblar. Düzdür, sonradan o, məhkəmə vasitəsilə işinə bərpa olunub. Bu gün dünya ədalətlə idarə olunmur, dünyada islamafobiya, türkəfobiya kabusu xüsusən Avropada və Şimali Amerikada dolaşmaqdadır. Çox təəssüf edirəm ki, sayları beş milyona qədər olan dılğır erməni millətinin, sayı əlli milyondan çox olan Azərbaycan millətinə qarşı belə zülmlərin edilməsinə göz yumurlar”. 

 

Qeyd edək ki, bu gün Vətən müharibəsi zamani ermənilərin Bərdəni raket atəşinə tutmasından bir il ötür. 2020-ci il oktyabrın 27-də düşmən növbəti dəfə xain və qəddarcasına cəbhə zonasından kənarda yerləşən Bərdənin Qarayusifli kəndini "Smerç" raketləri ilə atəşə tutub. Nəticədə dinc sakinlər - Cəfərova Ofeliya Məcid qızı, Əhmədova Aybəniz Əşrəf qızı, İsmayılov Ehtiram Xəlil oğlu, 2013-cü il təvəllüdlü İsgəndərova Aysu Rövşən qızı şəhid olub, 14 nəfər isə xəsarət alıb. Bərdə rayonu və şəhər mərkəzi İkinci Qarabağ müharibəsi dövründə ümumilikdə 3 dəfə (5, 27 və 28 oktyabrda) Ermənistan Silahlı Qüvvələrinin raket və ağır artilleriya hücumlarına məruz qalıb. Nəticədə 29 nəfər şəhid olub, 112 nəfər yaralanıb, rayonda yerləşən mülki infrastruktur obyektlərinə, nəqliyyat vasitələrinə külli miqdarda ziyan dəyib.