Azərbaycanda internetin sürəti ZƏİFDİR - 4G şəbəkəsi niyə İŞLƏMİR?

Dekabr ayından etibarən ölkədə beşinci nəsil simsiz texnologiya adlanan 5G şəbəkəsi tətbiq olunmağa başlayacaq. Müəyyən bir ərazini əhatə edəcək bu yenilik deyilənə görə, istifadəçilərə yüksəksürətli internet üstünlüyü yaşadacaq.

Bilirsiniz ki, ölkədə 4G şəbəkəsi hələ də tam olaraq özünü doğrultmayıb. Xüsusən də “Bakcell” mobil operatorlarında 4G nəinki sürətli internet təklif edir, heç normal şəbəkə xidməti belə göstərə bilmir.

Maraqlıdır, 5G rəqəminin arxasında real texnologiya gizlənirmi? Ölkədə 4G-nin özünü doğrultmadığı vaxtda 5G-yə keçidə ehtiyac varmıydı?

Bununla Redaktor.az-a açıqlama verən İKT Mərkəzinin direktoru Fərid Kazımov bildirib ki, hər bir şəbəkənin arxasında müəyyən texnologiya dayanmalıdır:

“4G deyilirsə, onun müəyyən sürəti, paketləşməsi, trafiki olmalıdır. 5G deyilirsə, bu, daha sürətli şəbəkə xidməti deməkdir. Lakin bizdə mobil operatorlar verdiyi 4G şəbəkə xidmətini məhdud ərazidə tətbiq edir. Fikir versəniz görərsiniz ki, mərkəzdən uzaqlaşdıqca, telefonunuzda 4G keçir 3G-yə. Hətta bəzi ərazilərdə 2G ilə də əvəz olunur. Deməli, şəbəkəylə bağlı yeniliklər müəyyən yerləri əhatə edir. 5G məhdud ərazini (Fəvvarələr meydanı) əhatə edir. İnsanlar da elə bilir ki, bir operator daha sürətli internet təklif edir, digəri isə zəif. Bu, çox önəmli məsələdir. Xidmətin olması hər yerdə onun tətbiq ediləcəyi anlamına gəlmir. İstifadəçilər bu incə məsələni nəzərə almalıdır. Əslində, 4G və 5G şəbəkələri yüksək sürətli internet təklif edir. Gələcəkdə “Wi-Fi” ilə internetə qoşulmağı 5G əvəz edəcək”.

5G sürətini yüksək tezliklər vasitəsi ilə həyata keçirmək mümkündür. O tezliklər başda insan olmaqla bütün canlılara mənfi təsir göstərə bilir. Dünyanın bir neçə ölkəsi artıq bu texnologiyadan imtina edib. Maraqlıdır, ölkəmizdə bu yenilik niyə tətbiq edilir?

Fərid Kazımov əlavə edib ki, bu gün əksər ölkər 5G şəbəkəsinin tətbiqinin vacib olub-olmaması məsələsini müzakirə edir:

“Əslində qalsa, hər bir texnologiya ziyandır. Onların hansının az, yaxud çox olması ekoloqların araşdırmasından sonra məlum olacaq. Burada çox vacib məsələ var, o da bu texnologiyanın qiymətidir. Xidmətin tətbiq edilməsi xərcləri çox yüksəkdir. Bu səbəblə, əksər ölkədə bunun vacib olub-olmaması məsələsi müzakirə edilir. Lakin zaman yeni texnologiyanın tətbiqini tələb edir. Necə ki, əvvəl GSM vardı, sonra 2G, 3G, 4G, indi də 5G gəlir. Sadəcə olaraq qeyd etdiyim kimi, burada ərazi məsələsi var. Layiə bahalı olduğu üçün yaxın zamanda onun bütün Azərbaycanı əhatə edəcəyini düşünmürəm. 4G-nin bəzi yerlərdə işlədiyi vaxtda 5G-nin geniş tətbiqindən söhbət gedə bilməz”.